Nora Brägger

mengisch goni usem hus u mue nomol umchere, wili mi im glas vode hustüre gseh u öppis stört mi oder i fühle mi ganz plötzlich so schrecklich unwohl, dasi weiss, so channi ned de ganz tag mit mir verbringe.

mengisch goni usem hus mit mini air force, wo immer weniger wis sind u irgendwenn wirds sputze mit de zahpaste au nüt me bewirke. es isch herbscht u i laufe scho ume wie im grösste winter, fett ipackt u findes dennoch verdammt chalt. i ha de abgang vom summer ned mitbecho u bi ide gedanke immer no irgendwo zwüsched meeresblau u himmelblauer witi, irgendwo vor mir im dunst sizilie u de ätna, wo glüeht.

mengisch vergessi dasi etz wieder voll im alltag igspannt bi u dasi eifach mitmach u versuech, dra zblibe, to-do-zettel schribe, to-do-erinnerige im iphone-kalender aktiviere, to-dos andauernd verschiebe, tag für tag e neue fokus sueche u schlussendli glich e stress bechum, wil zit vergoht u immer wieder endi demit, dasi nüt würkli mach, nüt woni söt u mengisch au nüt woni wöt, u dasi mengisch nöd emol me genau weiss, wasi denn die ganz zit gmacht ha u dasi doch eigentli so viel het wölle.

mengisch machtsmer angst, dasi so gad gar kei vorstellig vo mir ha, weder im jetzt no i noher zuekunft. i gseh immer nur anderi mensche, wie sie lebet u chinde bechömmed u schaffed u kunst mached u einfamiliehüser chaufed u i komune lebed u gmües abaued u älter werdet u immerno guet usgsehnd u vespa fahred u boccia spielet.

mengisch stelli mir vor, dasi uf reise wär, froge mi, wohere dasi gern wör u als wer dasi mi wör usge. i meine irgendwo, wo mi nirmert kennt, do chönnti jo egal wer si.

i ha immer wieder e einsams hus inere grüene wise irgendwo ade küste vo irland vor auge u swetter isch ruch u rau u grau u windig u regnerisch u das isch eigentli so gad gar ned mis ding, aber i bi döt i dem alte cottage ellei u schribe u es isch guet. mengisch mueni voruse go holz hacke i mim gelbe regemantel, u mengisch mueni is dorf mitem rucksack go ichaufe u mengisch nimmt mi es auto mit hei. mengisch wäri am briefe schribe a mensche, woni gern ha, u mengisch gspüri es vermisse u e leeri ide brust als warms poche u de laufi dur de windrege de klippe entlang u vor mir isch smeer wo ruschet u schümet wie wild.

mengisch denki, dasi genau sonen einsame wolf werde, wie min papa u de versuechi, mi dodra zerinnere, wer das gseit hegi, dass sie oder er einsiedler:inne spannend fändi.

mengisch wöri eifach gern als füchsli im wald lebe, het döt mini höhli u wör dur sunterholz streife u noch erfolgricher jagd zruck in bau chrüche u mi zemerolle.

mengisch wili alles u nüt u fühle alles u nüt u das isch verwirrend. mengisch findi slebe so scheisse u mengisch so scheiss schön.

mengisch wäri gern öpper anders, wör gern alles anderst mache, aber de denki au, wenni wüsst, dass alles neu u anders isch u de fändis mega scheisse, de wärs jo au mega scheisse, will de chönntis sicher nüm zruck wünsche, wil me het doch nume de einti krassi wunsch zguet u de hexhex u blingbling.

mengisch wili eifach es gmüetlichs tee trinke u obeabecho vo dem puls, wo mit 200 km/h dur mini brust rast, u de wili wieder genau das, de flash, das devodrifte.

mengisch wili für immer summer u de sprung i see u die chüeli nässi, womer das gwusel im chopf resetet.

mengisch denki wow, die mensche um mi hani so gern u sie sind mini family u mengisch wili eifach heigo zude eltere, obwohl ihres dehei scho lang nüm mis isch, u so schwierig ichs mit ihne mengisch finde, aber mengmol willi gern eifach vo ihne umarmt werde u sie wöred über mini hor striche u sege: alles wird guet u i wörs ihne glaube.

mengisch drucki deltere weg, wenn sie alütet u mengisch stelli uf lutsprecher u putze derzue sbad. mengisch schribt mama en whatsapp-roman, was sie gad alles so macht u wies ihre goht, u bsuech döt, u wanderig döt u selfie döt u i treie schir düre mit dem ewige game us mis lebe zbewohne, mi körper zbewohne, regelmässig zesse, u zwor gmües u salot u ned nume pizza u schoggi, ichaufe, putze, plane, uni, schaffe, an bahnhof laufe anstatt de bus zneh, so viel wie möglich schwarz fahre, mi ned verwütsche lo, allgmein so viel wie möglich chlaue, wil slebe isch tür u i wil mir geili sache gönne u ned nume so m-budget-scheisse, obwohl m-budget-cookies sind die beste u i kenne au öpper, wo uf dspaghetti schwört u i will halt au so fairtrade u bio u vegi u vegan.

mengisch dropt psychologin mit ihrne instagram-hashtag-quotes mir id ohre: «selbstliebi isch schön» u de ghöri direkt mini dütschlehrerin usem gymi: «schön ist ein langweiliges und unspezifisches adjektiv» u denn denki an kontroverse buechtitel: «immer ist alles schön» u de denki an summer u dwärmi u mini hoffnig, dass denn würkli mol alles für en moment cha schön si, eifach nume schön. u i weiss genau, dass da e egoistische wunsch isch u i lose nochrichte u stromere dur dstadt u denke, wie abgfuckt mir mensche doch mitenand umgönd u de werdi wieder depri vo 0 uf 100 u mache jo glich nüt ussert resigniert mitschwimme.

mengisch erdrücked mi die möglichkeite, die ständigi suechi noch inhalt, de druck dasmer doch söttet happy si u nöd undergönd i üsem privilegierte gejammer.

mengisch wili dfrog: «wie gohts?» eifach nöd beantworte u i super afine moment chönnti eifach brüele u mengisch segi eifach: «guet u dir? – gad chli stressig u bi dir? – geht so u bi dir?» gopfritstutz, das chas doch ned si. kreised mir ide immer gliche kreise? beweged mir üs vo wochenend zu wochenend? vo höch zu tüf zu höch? schwimmed im alltag u träumed vom meer, während anderi im mittelmeer ertrinked?

mengisch hani chopfweh vom viele studiere, wasi denn etz genau söll, wo ig mini verantwortig cha wohrne, woni eifach cha ig si, wo ig cha zfriede si. mini gedanke verschiebed sich, alles isch mit allem conected u i verlüre mi i dem ewige strom, i dere fluet vo reklame, gspröchsfetze im zug, masketragpflicht, depop, e-mails, to-dos, nochrichte bling-bling, echo der zeit, tiktok, insta, klimagipfel u i denke: i wör etz eifach gern hurtli noch italie, aber denn ertönt die monotoni zugdurchsag: «nächster halt: bümpliz nord.»